Жарыяланган
2026-11-05, 14:32Америка менен Израиль Иранга каршы согуш аракеттерин баштагандан бери дүйнө жүзүндө газ жана күйүүчү майдын баасы кескин кымбаттады. Бул Кыргызстанга да түз таасир тийгизүүдө. Бул тууралуу президенттик администрациянын маалыматтык саясат кызматынын жетекчиси Дайырбек Орунбеков билдирди.
Анын айтымында, мурда согуш башталганга чейин Россиядан АИ-92 үлгүсүндөгү бензиндин тоннасын 650 доллардын тегерегинде алып келинсе, учурда анын баасы орточо 950 доллар. Ал эми дизель отунун мурда тоннасы болжол менен 700 доллар болсо, азыр 1200 доллардан ашты.
Казакстанда күйүүчү майдын арзандыгы боюнча суроолорго жооп берип, ал өлкөдө ири мунай запастары бар экенин жана баалар мамлекет тарабынан субсидияланарын белгиледи.
Кыргызстанда да ушундай эле механизм электр энергиясы тармагында колдонулат. Тактап айтканда, электр энергиясынын өздүк наркы 3 сомдон ашса да, калкка 1 сом 64 тыйындан берилет, калган айырманы мамлекет жабат.
Орунбековдун айтымында, Кыргызстанда мунай запастары жетиштүү болгондо баалар да төмөн болмок.
“Ошондуктан өзүбүздө жок ресурстар үчүн бири-бирибизди күнөөлөп наалыбай, маселеге реалдуу карайлы”, — деп белгиледи ал.
Ошол эле учурда өлкөдө импортко көз карандылыкты азайтуу үчүн “Кыргызнефтегаз” жана “Джунда” заводдорунда модернизация жүрүп жатат. Жаңылангандан кийин евростандарттагы күйүүчү май өндүрүлүп баштайт.
