Жарыяланган
2026-30-10, 11:29Binance криптовалюта биржасы хакердик чабуулдан келтирилген чыгымды болжол менен 6.3 млрд долларга баалады. Анын ичинен 3 млрд долларга жакын каражатты тоңдурууга жетишкен. Бул тууралуу компания 30-октябрда билдирди.
Алдын ала иликтөөгө ылайык, хакерлер компаниянын техникалык адисинин ноутбугун бузуп, ал аркылуу Binance системасына кирип, уруксатсыз каражат чыгарып кетишкен болушу мүмкүн.
Бирок компания криптовалюта капчыктарынын жашыруун ачкычтары сыртка чыгып кеткенин тастыктаган далилдер табылбаганын билдирди.
Binance бардык чыгымдарды атайын SAFU резервдик фонду жана өз каражатынын эсебинен төлөп берүүнү убадалады. Ошондой эле колдонуучулардын акчалары коопсуз экенин белгиледи.
Коопсуздукту текшерүү үчүн биржа эсептерге акча салууну жана акча чыгарууну убактылуу токтотту. Мындан тышкары, тиешелүү даректи колдонууга берилген уруксатты жокко чыгарып, каражаттарды кайтаруу үчүн укук коргоо органдарына жана блокчейн боюнча адистерге кайрылды.
Иликтөө аяктагандан кийин Binance окуянын чоо-жайы жана өзүнүн резервдери тууралуу толук маалымат жарыялайт.
Учурда хакердик чабуулдун так себептери жана чыгымдын акыркы суммасы аныктала элек.
