Жарыяланган
2026-17-06, 13:09Мамлекеттик салык кызматы (МСК) экономикадагы бир катар тармактарды, анын ичинде блогерлер менен алтын казуучу компанияларды камтыган салык саясатындагы өзгөртүүлөр боюнча түшүндүрмө берди.
МСК төрагасы Алмамбет Шыкмаматовдун айтымында, негизги максат — ар бир тармактын кирешесине жараша салык жүгүн адилеттүү бөлүштүрүү.
Анын айтымында, блогерлер үчүн салыктык жеңилдиктер коомчулукта кызуу талкуу жаратып, ал эми алтын казуучу компаниялардан түшкөн кирешелердин өсүшү көңүл сыртында калган.
Шыкмаматов бул өзгөрүү дүйнөлүк рынокто алтындын баасынын өсүшү жана алтын казуучу компаниялардын кирешесинин өсүшү менен байланыштуу экенин айтты.
«Биз салыкты бир аз жогорулаттык, анын эсебинен быйыл бюджетке кошумча 10 млрд сомго жакын каражат түштү. Бул адилеттүү чечим. Анткени алтындын баасы өсүп жатса, салыктын көлөмү да ошого жараша өзгөрүшү керек», — деди ал.
Шыкмаматов өзүнчө блогерлер төлөгөн салыктар тууралуу да маалымат берди. Анын айтымында, сөз жарнамадан киреше тапкан болжол менен 40тай блогер жөнүндө болууда. Ал белгилегендей, бул категориядан түшкөн салыктын жалпы көлөмү өлкө бюджетинин жалпы кирешеси менен салыштырганда өтө эле аз үлүштү түзөт.
«Бул 40 блогер жалпысынан болгону 1.2 млн сом салык төлөйт. Салыштырып көрсөк, быйыл биз болжол менен 370 млрд сом салык чогултабыз», — деди Шыкмаматов.
МСК башчысы блогерлер үчүн жеңилдиктер санариптик экономиканын өзгөчөлүгүнө байланыштуу экенин белгилеп, коомдук талкуулар көбүнчө эң көрүнүктүү тармактарга гана көңүл буруп, жалпы сүрөттү бурмалап көрсөтөрүн кошумчалады.
Ал жалпысынан, салык саясаты узак мөөнөттүү экономикалык натыйжаларды эске алуу менен түзүлүп, айрым тармактарды өнүктүрүү жана ашыкча киреше алып жаткан секторлорду жөнгө салууга багытталганын белгиледи.
