Борбор Азияда туристтер үчүн чек арадан өтүүнү жеңилдетүү сунушталды

Борбор Азия өлкөлөрүнүн чек арасынан туристтердин өтүүсүн жеңилдетүү сунушталды. Бул демилгени Туризм боюнча мамлекеттик агенттиктин директорунун биринчи орун басары Эрденет Касымов көтөрдү.

Анын айтымында, туристтик топтор үчүн чек арада «жашыл коридорлорду» түзүү сунушталууда. Бул чек ара бекеттеринен өтүү убактысын кыскартууга жардам берет.

Мындан тышкары, Борбор Азия өлкөлөрү үчүн бирдиктүү туристтик виза киргизүү мүмкүнчүлүгүн карап чыгуу сунушталды. Мындай виза чет элдик туристтердин аймактагы өлкөлөргө саякаттоосун жеңилдетет.

Бул чаралар чек арадагы туризмди өнүктүрүүгө, биргелешкен туристтик маршруттарды түзүүгө жана Борбор Азиянын бирдиктүү туристтик брендин калыптандырууга багытталган.

Кыргызстан, Тажикстан жана Өзбекстан аймактагы туристтик кластерлерди өнүктүрүү боюнча биргелешкен чараларды да талкуулап жатышат.