Ысык-Көлдү топурак менен толтуруп жатышат. Эмне үчүн?

«Елизавета» жана «Авангард» компаниялары Тамчы айылында Ысык-Көлдүн жээгин топурак менен толтуруп жатышат. Жаратылыш министрлиги бул долбоор боюнча экологиялык экспертиза жүргүзүлгөн эмес деп билдирүүдө. Ал эми курулуш министрлиги иштер мыйзамдуу жүргүзүлүп, жээкти бекемдөө максатын көздөйт деп түшүндүрүүдө.

Тамчы айылында Ысык-Көлдүн жээгинде жүрүп жаткан курулуш иштери коомчулукта талкуу жаратып, экологиялык мыйзамдарга шайкеш келеби деген суроолорду пайда кылды.

Активист Эртай Искаков социалдык тармактарга жээкке жакын жерге карьерден алынган топурак төгүлүп жатканын билдирген. Анын айтымында, иштер «Елизавета», «Урпак Резорт» (куруучу «Кыргыз Инвест Строй») жана «Авангард Резорт» (куруучу «Авангард Стиль») компанияларына тиешелүү объекттерде жүрүп жатат. Ал жерден видео жарыялап, кырдаалды текшерүүнү талап кылган.

Курулуш министрлиги бул иштер баткак жээкти бекемдөө жана эс алуучулардын коопсуздугун камсыздоо үчүн жүргүзүлүп жатат деп түшүндүрдү. Учурда жергиликтүү топурак колдонулуп жатканын, кийин анын үстүнө кум төшөлөрүн маалымдалды. Ошондой эле үч беш жылдыздуу пансионат куруу долбоордук жана уруксат документтеринин негизинде жүрүп жатканын белгиледи.

Бирок Жаратылыш министрлиги бул аймак боюнча экологиялык экспертиза берилбегенин тактады. Бул жагдай курулуш иштеринин айлана-чөйрөгө тийгизген таасири бааланбаганын билдирет.

Эколог Сергей Криворучко «Акчабар» редакциясы менен болгон маегинде көлдүн жээгинде масштабдуу курулуш иштерин жүргүзүүгө расмий уруксаттар бар экенине күмөн санаган.

«Ысык-Көл сыяктуу өзгөчө экологиялык режимдеги аймактар үчүн, экологияны коргоо боюнча ыйгарым укуктуу мамлекеттик орган жана жергиликтүү бийлик органдарынан тийиштүү түрдө алынган уруксат документтери жок болсо, мындай иштердин мыйзамдуулугун прокуратура органдары тарабынан текшерүү зарылдыгы бар», — деп белгилеген ал.

Ошондой эле ал масштабдуу жер иштери жээктеги жергиликтүү экосистемага орду толгус зыян келтириши мүмкүн экенин айткан.

Райондук акимчилик бул жерде Мамлекеттик техникалык инспекция иштеп жатканын маалымдады. Ал эми Жаратылыш министрлиги текшерүүлөр болушу мүмкүн экенин, бирок азырынча толук экологиялык баалоо маселеси көтөрүлө электигин билдирди.

Жогоруда айтылгандарга байланыштуу, «жээкти бекемдөө» деп айтылып жаткан иштер азырынча тиешелүү органдар тарабынан каралып, текшерилеби же жокпу деген суроо ачык бойдон турат.