Жарыяланган
2026-06-03, 13:47Энергетикалык инфраструктураны жаңылоо иштери уланууда. Бул тууралуу Энергетика министрлигинен билдиришти.
Анын алкагында узундугу 80 чакырым болгон 110 кВ «Тамга–Пржевальск» аба чубалгысы толугу менен реконструкцияланат.
Бул линия Каракол шаарын, ошондой эле Жети-Өгүз району жана Ак-Суу районунун электр энергиясы менен камсыз кылат. Реконструкция 2026-жылдын аягына чейин аяктайт деп пландалууда.
Мындан тышкары, быйыл 35–110–220 кВ чыңалуудагы 1411 чакырым аба чубалгысы техникалык тейлөөдөн өткөрүлөт. 1964-жылы орнотулган 5495 эски фарфор изолятор заманбап айнек изоляторлорго алмаштырылат.
Ошондой эле 13 тирөөчтө суу ташкынына каршы алдын алуу иштери жүргүзүлөт. Бул чаралар электр энергиясын жеткирүүнүн ишенимдүүлүгүн жогорулатып, авариялык өчүрүүлөрдү азайтууга багытталган.
