Жарыяланган
2026-05-08, 10:14Жол курууга бөлүнгөн бюджеттик каражаттарды пайдалануу боюнча текшерүүдө мамлекетке 171 млн сомдон ашык зыян келтирилгени аныкталды. Бул тууралуу Башкы прокуратура билдирди.
Маалыматка ылайык, мыйзам бузуулар Ак-Суу районундагы Жыргалаң лыжа базасына баруучу жолду куруу жана Түп районундагы Каркыра-Турук-Сары-Жаз жолуна шагыл төшөө иштеринен аныкталган.
Текшерүүдө жол тармагындагы мамлекеттик ишканалар тиешелүү талаптарга жооп бербеген “Д.Т.” ЖЧКсын субподрядчы катары тартышканы белгилүү болгон. Компаниянын тиешелүү тажрыйбасы жана жетиштүү материалдык-техникалык мүмкүнчүлүктөрү болгон эмес.
Ошондой эле керектүү кепилдиктер жана аткарылган иштерди тастыктаган документтер жок болгонуна карабай, компанияга бюджеттик каражаттар которулган. Натыйжада каражаттар максатсыз пайдаланылган.
Бул фактылар боюнча Кылмыш-жаза кодексинин "Кызмат абалынан кыянаттык менен пайдалануу" жана "Ишенип берилген мүлктү ыйгарып алуу же коротуп жиберүү" беренелери менен эки кылмыш иши козголуп, тергөө жүрүп жатат.
