Кыргызстан Түрмөнстандан помидорду азыраак, Кытай менен Өзбекстандан көбүрөөк сатып ала баштады

Кыргызстан Түрмөнстандан помидорду азыраак, Кытай менен Өзбекстандан көбүрөөк сатып ала баштады. Муну Статистика комитетинин маалыматынан көрүүгө болот.

Быйыл январь-апрель айларында Кыргызстанга чет жактан 11.55 миң тонна помидор импорттолгон. Анын жалпы наркы 1 млрд сомдон ашкан.

Бул жашылча Түркмөнстан, Кытай, Өзбекстан, Иран жана Казакстандан сатып алынган:

• Түркмөнстан – 6.32 миң тонна (561.3 млн сом); 
• Кытай – дээрлик 4 миң тонна (371.8 млн сом); 
• Өзбекстан – дээрлик 1.2 миң тонна (103.3 млн сом). 
• Казакстан – 55.7 тонна (5.117 млн сом) 
• Иран – 24.1 тонна (2.8 млн сом) 

Сырттан келген помидордун килограммынын орточо баасы:

• Түркмөнстан – 88.8 сом;
• Кытай – 93.4 сом;
• Өзбекстан –87.9 сом;
• Казакстан – 91 сом;
• Иран –116 сом.

Помидордун көбү же 6.32 миң тоннасы Түркмөнстандан сатып алынганы келгени менен 2025-жылдын төрт айына караганда импорт дээрлик 2.1 миң тоннага азайган. Былтыр январь-апрель айларында Түркмөнстандан дээрлик 8.4 миң тонна импорттолгон.

Ошол эле учурда Кытай менен Өзбекстандан помидор көбүрөөк сатып алына баштаган: эки өлкөдөн тең импорт 3.1 эсе өскөн.

Маселен былтыр төрт айда Кытайдан 1.3 миң тоннадай помидор ташып келинсе, быйылкысында дээрлик 4 миң тонна импорттолгон.

Ошондой эле Өзбекстандан 2025-жылдын январь-апрель айларында 374.8 тонна сатып алынса, быйылкысында 1.2 миң тоннага жакын ташып келинген. 

Ал эми Казакстандан болсо 2025-жылдын төрт айында помидор сатып алынган эмес. Ирандан болсо 79.6 тонна импорттолгон.

Былтыр январь-апрель айларында болсо өлкөгө жалпы 10.1 миң тоннадан помидор алынып келип, анын баасы 751.8 млн сомду түзгөн. Былтыркы төрт айга салыштырмалуу быйылкысында импорт 1.43 миң тоннага көбүрөөк болгон.