Жарыяланган
2026-20-05, 18:04Кыргызстанда майда жол кырсыктарын милиция кызматкерлерин чакырбай эле каттоого мүмкүндүк берген европротокол системасын киргизүү пландалууда. Бул маселе 19-майда Жогорку Кеңештин Финансы жана бюджет боюнча комитетинде милдеттүү автокамсыздандыруу системасын талкуулоо учурунда белгилүү болду.
Камсыздандыруу тармагынын өкүлдөрүнүн айтымында, тиешелүү өзгөртүүлөр мамлекеттик органдар жана Камсыздандыруучулар ассоциациясы менен биргеликте даярдалып жатат.
Жаңы система ишке кирсе, айдоочулар майда жол кырсыктарын өздөрү каттап, милицияны күтпөстөн камсыздандыруу төлөмдөрүн тезирээк ала алышат.
Депутат Дастан Бекешев азыркы учурда кичине эле кырсык болсо да айдоочулар милицияны көпкө күтүүгө аргасыз болуп жатканын айтты. Айрым учурда унаалар айып короого токтотулуп, камсыздандыруу төлөмдөрү кечиктирилет.
Камсыздандыруу компаниялары европротокол системасы айдоочуларга да, мамлекеттик органдарга да жеңилдик берерин белгилешти. Бул камсыздандыруу учурларын тезирээк чечүүгө жана жарандардын нааразычылыгын азайтууга жардам берет.
Жыйындын жүрүшүндө депутаттар милдеттүү автокамсыздандыруу азыр көпчүлүк жарандар үчүн жөн гана кошумча төлөм катары кабыл алынып жатканын айтышты.
Мындан тышкары, чет өлкөдөн Кыргызстанга кирген унаалар үчүн жергиликтүү милдеттүү камсыздандырууну киргизүү сунушталды.
