Жарыяланган
2026-24-02, 16:39Бүгүн, 24-февралда Жогорку Кеңештин тийиштүү комитет жыйынында жол тескөөчүлөрдүн 6 суроосунун төртөөсүнө жооп бере албагандарды айдоочулук күбөлүгүнөн ажыратууну караган мыйзам долбоору каралды.
Баяндамачы Ички иштер министринин биринчи орун басары Адылбек Бийбосунов билдиргендей, одоно жол эрежесин бузууга 8 эреже киргизилген.
“Жол эрежесин бузган айдоочуга 6 суроо берилет.Суроо автоматтык түрдө тандалат.Төрт суроого жооп берген айдоочу андан ары кете берет. Жооп бере албай калса айдоочулук күбөлүгү алынат. Кайра экзамен тапшырууга жөнөтүлөт”, - деди ал.
Депутат Болот Ибрагимов бул коррупциялык мыйзам болуп калышы мүмкүн экенин айтты.
Адылбек Бийбосунов кызматкерлерге камера орнотулганын жана колдонулган планшеттерде да үн жаздыруу системасы иштеп турарын айтты.
