Жарыяланган
2026-04-08, 09:342026-жылдын январь—май айларында Кыргызстанга чет өлкөлөрдөн акча которуулардын көлөмү 1 млрд 247.4 млн долларды түздү. Бул өткөн жылдын ушул мезгилине салыштырмалуу 119.8 млн долларга, же 8.8%га аз.
2025-жылдын алгачкы беш айында өлкөгө 1 млрд 367.2 млн доллар которулган.
Каражаттын негизги бөлүгү мурдагыдай эле Россиядан келген. Январь—май айларында бул өлкөдөн 1.1 млрд доллар келип, жалпы которуулардын 88.3%ын түздү. Бирок бул көрсөткүч былтыркыга салыштырмалуу 180.9 млн долларга, же 14.1%га аз. 2025-жылдын ушул мезгилинде Россиядан дээрлик 1.3 млрд доллар которулган.
Ошол эле учурда алыскы чет өлкөлөрдөн түшкөн акча которуулар олуттуу өстү. Алардын көлөмү 67.9 млн доллардан 105.8 млн долларга жетип, 55.8%га көбөйдү. Айрыкча АКШдан келген которуулар 27.6 млн доллардан 68.7 млн долларга чейин өсүп, дээрлик 2.5 эсеге көбөйдү. Түркиядан болсо 4.5 млн доллар которулду, өткөн жылы бул көрсөткүч 4 млн доллар болгон.
Май айында эле Кыргызстанга 287.9 млн доллар которулган. Бул 2026-жылдын башынан берки эң жогорку айлык көрсөткүч болгону менен, 2025-жылдын май айындагы 299.2 млн долларга салыштырмалуу 3.8%га төмөн.
Акча которуулардын жалпы көлөмүнүн азайышына карабастан, кыргызстандыктардын чет өлкөдө иштөөгө кызыгуусу сакталууда. Эмгек министрлигинин маалыматына ылайык, 2026-жылдын башынан бери жеке ишке орноштуруу агенттиктеринин жардамы менен 10.8 миң Кыргызстандын жараны чет өлкөгө жумушка орношкон.
Негизги багыт Түркия болду. Мындан тышкары, кыргызстандыктар көп барган өлкөлөрдүн катарында Улуу Британия, Болгария жана Германия бар.
