Жарыяланган
2024-30-10, 16:36Кыргызстандык дыйкандар Өзбекстанга ай сайын 80 тоннага жакын картошка жөнөтүшөт. Мындай макулдашууга Кыргызстандын Өзбекстан Республикасындагы Соода өкүлчүлүгү менен Суу ресурстары, айыл чарба жана кайра иштетүү өнөр жайы министрлиги жетишти.
Соода өкүлчүлүгү келишим "Olma" супермаркеттер тармагы менен түзүлгөнүн белгиледи.
"Өзбекстандагы эң ири супермаркет түйүндөрүнүн бири менен кызматташуу айыл чарба продукциясынын экспортун көбөйтүүгө гана жардам бербестен, кыргыз картошкасынын брендин аймактагы жогорку сапаттагы, экологиялык жактан таза жана суроо-талапка ээ болгон продукт катары таанытууга да шарт түзөт", - деп белгиледи соода өкүлү Алмаз Темирбеков.
Мындан тышкары, Соода өкүлчүлүгү "Olma" супермаркеттер тармагы менен Кыргызстандын ичүүчү суусун, балык азыктарын, бал жана сүт азыктарын жеткирүү боюнча сүйлөшүүлөрдү жүргүзүүдө, бул Өзбекстандын рыногунда кыргыз продукциясынын ассортиментин кеңейтүү үчүн жаңы перспективаларды ачат.
Эске салсак, буга чейин “Акчабар” Өзбекстан биринчи жарым жылдыкта Кыргызстандын картошкасын эки эсе көп сатып алганын жазган. Жаңы келишимди эске алганда, жылдын аягына чейин бул сан бир топ көбөйүшү мүмкүн.
