Жарыяланган
2026-21-04, 15:54Кыргызстандын Министрлер кабинети электр унаалары үчүн инфраструктураны өнүктүрүүнү тездетүү максатында мамлекеттик сатып алуулар эрежелерине өзгөртүү киргизди.
Токтомго ылайык, мамлекеттик жана муниципалдык ишканалар, ошондой эле мамлекеттин үлүшү бар компаниялар эми электр унаалары үчүн заряддоо инфраструктурасын түзүү жана өнүктүрүү үчүн товарларды, жумуштарды жана кызматтарды сатып ала алышат.
Бул электр кубаттоочу станцияларды куруу жана жабдуу иштерин да камтыйт. Мындай сатып алуулар республикалык жана жергиликтүү бюджеттерден, ошондой эле мыйзам менен тыюу салынбаган башка булактардан каржыланышы мүмкүн.
Өзгөртүүлөр өлкөдө жашыл экономикага өтүүнү колдоо жана электр транспортун өнүктүрүүгө багытталган. Мурдагы эрежелерде мындай долбоорлорду жөнгө салган өзүнчө жобо жок болчу.
Токтом расмий жарыялангандан кийин жети күндөн соң күчүнө кирет.
