Көп балалуу үй-бүлөлөргө 2 млн сомго чейинки төлөм келерки жылы эмес, 2027-жылдан тарта бериле баштайт

Кыргызстанда бийик тоолуу жана алыскы барууга кыйын аймактарда жашаган көп балалуу энелерге бир жолку “Бала береке” төлөмүн берүү тууралуу мыйзам долбоору бүгүн, 1-сентябрда Жогорку Кеңештин Бюджет, экономикалык жана фискалдык саясат боюнча комитетинин жыйынында биринчи окууда каралып, жактырылды. 

Социалдык камсыздоо министри Канат Сагынбаевдин айтымында, аталган төлөм төрт жана андан көп балалуу болгон үй-бүлөлөргө 100 миң сомдон 2 миллион сомго чейин берилет. Акча бала бир жашка чыкканда төлөнөт. Ошондо бул мыйзам 2026-жылы күчүнө кирет, бирок төртүнчү жана андан кийин бала үчүн төлөм 2027-жылдан тарта бериле баштайт. Бул төлөмдү берүүгө 2027-жыл үчүн 6.6 млрд сом каралган. 

Бериле турган акчанын өлчөмү: 

• Төртүнчү баласын төрөгөндөргө – 100 миң сом;
• Бешинчисине – 600 миң сом;
• Алтынчысына – 800 миң сом;
•  Жетинчи балага – 1 млн сом;
•  Сегизинчи балага – 1.2 млн сом;
•  Тогузунчу балага – 1.5 млн сом;
• Он жана андан көп балалуу болгондорго 2 млн сом берилет.