Манас жана Талас шаарларында “Акылман” президенттик лицейи ачылат

Манас жана Талас шаарларында “Акылман” президенттик лицейи ачылат. Жаңы окуу жылына карата окуучуларды кабыл алуу башталат. Бул тууралуу лицейдин директору Эмил Рыскулов “Биринчи радиого” берген маегинде билдирди.

Анын айтымында, 15-марттан 15-апрелге чейин окуучулар үчүн онлайн каттоо жүргүзүлөт. Быйыл жаңы ачылган филиалдарга 7–8-класстарда окуй турган окуучулар кабыл алынат. Ошондуктан сынакка 6–7-класстын окуучулары катыша алат.

15-апрелден май айынын аягына чейин 7-класстар үчүн (азыркы 6-класстын окуучулары) конкурс өткөрүлөт. Ал эми 8-класстар үчүн (азыркы 7-класстын окуучулары) сынак июнь айында башталат.

Жалпысынан 3 тур өткөрүлөт: биринчи жана экинчи тур онлайн форматта, үчүнчү тур областтык борборлордо офлайн негизде уюштурулат.

Учурда кабыл алуу иштерин лицейдин кабыл алуу комиссиясы жүргүзүп жатат.