Жарыяланган
2025-16-01, 10:52Улуттук банк Кыргызстандагы банкка, тактап айтканда, "Керемет Банкка" каршы санкциялардын киргизилишине байланыштуу расмий билдирүү таратты.
Маалыматта Кыргызстандын банк сектору туруктуу, адекваттуу капиталдаштырылган жана жетиштүү ликвиддүүлүккө ээ экендиги баса белгиленген. Коммерциялык банктар кадимки режимде иштеп, кардарларга үзгүлтүксүз кызмат көрсөтүүдө. Ички валюта рыногу да туруктуу бойдон калууда.
Улуттук банк санкциялардын банк тутумуна мүмкүн болуучу терс таасирин минималдаштыруу жана өлкөнүн финансылык туруктуулугун камсыз кылуу боюнча жигердүү иштерди жүргүзүүдө.
Мындан тышкары, Улуттук банк зарыл болгон учурда банк тутумунун туруктуулугун, ошондой эле аманатчылардын жана кредиторлордун кызыкчылыктарын коргоо үчүн кошумча чаралар жана инструменттер колдонулат деп ишендирди.
Мекеме кырдаалга мониторинг жүргүзүүнү улантууда жана финансы секторунун ишенимдүүлүгүн камсыз кылуу үчүн бардык зарыл чараларды көрүүдө.
15-январда АКШнын Каржы министрлиги чет элдик активдерди көзөмөлдөө башкармалыгынын жаңы санкциялар топтомун жарыялап, Кыргызстандагы "Керемет Банкка" санкция салганы белгилүү болду.
