Жарыяланган
2025-06-03, 09:23Президент Садыр Жапаров кыргыз-тажик чек арасы боюнча келишим тууралуу Жогорку Кеңештин депутаты Султанбай Айжигитовдун сынына комментарий берип, аны “демагогия” деп атады. “Кабар” агенттигине берген маегинде президент депутаттын келишимдеги кемчиликтерге берген баасы менен макул болгон жок.
Президент толук маалыматка ээ болгон депутат позициясын өзгөрткөнүн, бул таң калыштуу экенин белгиледи. Садыр Жапаров 19 миң 500 гектар жерди өткөрүп берүү боюнча айтылган дооматтарды четке кагып, илгерки карта боюнча 14 миң 500 гектарды жана жайыт жерлерди алмашууну, анын натыйжасында Ворухтун аянты 15 миң 500 гектарды түзгөнүн белгиледи.
Жапаров ошондой эле Достук айылынын Ворухка “дарбаза” катары ролу жөнүндөгү билдирүүнү четке кагып, келишимдин максаты стратегиялык пайда эмес, чыр-чатактуу аймактарды жөнгө салуу экенин баса белгиледи. Ал алмашуу татаал чек аралары бар анклавдарга жана аймактарга тиешелүү экенин белгиледи.
"Дагы бир сөзүнө көңүл бурдум. “Настоящий договор бессрочно, денонсации не подлежит деп туура эмес кылышкан” дейт. Бул кишинин ою боюнча ар жыл сайын кайрадан жер талашып, согушуп, атышып турушубуз керекпи? Чек ара түбөлүккө чечилди. Бүттү, эки тараптын кызыкчылыгы теңме-тең болуп чекит коюлду", - деди Жапаров.
Эске салсак, депутат Султанбай Айжигитов Жогорку Кеңештин 5-марттагы жыйынында “Баткен районундагы Достук айылы Тажикстанга өтүп кетсе, Ворух анклавына коридор ачыларын” билдирген. Бул сөзүнөн кийин “Ыйман Нуру” фракциясы аны катарынан чыгарды.
