Жарыяланган
2025-26-02, 10:30Кыргызстанда 2025-жылдын 1-январынан тарта ишкердик субъекттерин текшерүүгө кайрадан уруксат берилди. Бул президенттин 2024-жылдын 9-январындагы жарлыгы менен киргизилген мораторийдин мөөнөтү аяктаганына байланыштуу. Чектөөлөр 2024-жылдын 31-декабрына чейин күчүндө болуп, экономикалык активдүүлүктү турукташтырууга жана жагымдуу бизнес чөйрөсүн түзүүгө багытталган.
Бизнести текшерүүгө мораторий алгач 2023-жылы киргизилип, андан кийин ал бир нече жолу узартылган. Анда мыйзам бузууларга байланыштуу учурларды кошпогондо, укук коргоо жана ыйгарым укуктуу органдар тарабынан текшерүүгө тыюу салынган. Ошондой эле, чектөөлөр салыктык жана бажылык текшерүүлөргө, тамак-аш азыктарынын коопсуздугу жаатындагы текшерүүлөргө жана Улуттук банктын банк мыйзамдарынын алкагындагы ишмердүүлүгүнө карата колдонулган эмес.
Мораторийдин аякташы мамлекет башчынын 2025-жылдын 17-февралындагы жарлыгы менен бекитилген. Документ жаңы чектөөлөрдү киргизбейт, болгону мурунку ченемдик укуктук актынын күчүн жокко чыгарат.
Мораторий инвестиция тартууга жана бизнеске административдик басымды азайтууга жардам бергени белгиленди. Бирок ишкерлер эми мамлекеттик органдар тарабынан пландуу текшерүүлөрдүн кайра башталышына даяр болушу керек.
