Жарыяланган
2025-22-08, 10:34Жакында Баткен районунда 3 өндүрүш ишканасы ишке кирет. Бул тууралуу президенттин Баткен облусундагы өкүлчүлүгү билдирди.
Маалым болгондой, Эгемендик күнүнө карата Самаркандек айылында мөмө-жемиштерди кайра иштеткен цех, Ак-Татыр айылында желим жана кагаз идиш-аяктарды чыгарган ишкана жана Жаңы-Жер айылында мөмө-жемиштерди тоңдуруп сактоочу цех иштей баштайт.
Самаркандектеги цех күнүнө 5 тонна мөмө-жемишти кайра иштете алат. Бул ишканада 30 жумуш оруну түзүлөт. Ишкананы ачууга баш-аягы 16 млн сом сарпталган.
Ак-Татырдагы ишканада тамак-аш үчүн желим жана кагаз идиштер чыгарылат. Желим идиштер кайра иштетилет. Ишканага жалпы 52 млн сом сарпталды. Ал жакта 30 киши иштейт.
Жаңы-Жер айылындагы цех (ваакуумдук муздаткыч) 500 тонна мөмө-жемишти сактоого ылайыкташкан. Ал жерде 5 жумуш оруну түзүлөт. Бул ишкананы ачканга 22 млн сом сарпталган.
