Жылына 100 млрд сомго чейин алып келет. Кыргызстанга YouTube’дун монетизациясын кайтаруу маселеси көтөрүлдү

Кыргызстанга YouTube’дун монетизациясын кайтаруу өлкө экономикасына 100 млрд сомго чейин алып келе алат. Бул тууралуу балдарга арналган D Billions долбоорунун командасы Мамлекеттик салык кызматынын башчысы Алмамбет Шыкмаматов менен болгон жолугушууда билдирди. 

Жолугушуу учурунда D Billions’тун өкүлдөрү Кыргызстанда YouTube’дун монетизациясы жоктугу тууралуу маселени көтөргөн. Алардын айтымында, бир учурда Кыргызстан монетизация бар өлкөлөрдүн катарына кирип, бирок бир жумадан кийин андан чыгарылган. 

D Billions командасы мамлекет аталган маселени чечүүгө жардам берет деп үмүттөнөт. Алар монетизация кирсе, өлкө экономикасына 100 млрд сом алып келерин айтышат. 

Эскерте кетсек, D Billions YouTube’да балдар үчүн видео жасаган, дүйнөгө таанылган Кыргызстанда негизделген долбоор. Алардын видеолору 45 миллиарддан ашык жолу көрүлгөн.