Жарыяланган
2026-06-08, 17:28Кыргызстандын тхэквондо боюнча спортчулары авиабилеттердеги көйгөйдөн улам Азия чемпионатына бара албай калышты. Турфирма бул үчүн мурдагы кызматкерин күнөөлөп жатат.
Кыргызстандын ITF тхэквондо боюнча курама командасы Монголияда өтүп жаткан Азия чемпионатына катыша алган жок. Каттоодон өтүү учурунда алдын ала төлөнгөн авиабилеттердин көбү системада жок экени аныкталган. Кыргызстандын ITF тхэквондо федерациясынын маалыматына ылайык, билеттерди сатып алууга 2 миллион сомдон ашык каражат жумшалган.
Белгилеп кетсек, сөз жөн гана мелдеш тууралуу болуп жаткан жок. ITF тхэквондо боюнча Азия чемпионаты эки жылда бир өткөрүлүүчү континенттеги эң негизги мелдеш. Быйыл аны Монголия кабыл алып, 3-августтан 9-августка чейин Азия өлкөлөрүнүн күчтүү спортчулары медалдар үчүн күч сынашты.
Кыргызстандын делегациясынын курамында 40 адам, анын ичинде 32 спортчу, машыктыруучулар, калыс, федерациянын жетекчилиги жана коштоочулар болгон. Эл аралык жана Азия тхэквондо федерациялары кыргызстандык команданын каттоосун узартууга даяр болушкан. Бирок кыска убакыттын ичинде керектүү сандагы авиабилеттерди табуу мүмкүн болбой, курама команда мелдешке катышуудан баш тартууга аргасыз болду.
Кыргызстандын тхэквондо ITF федерациясынын вице-президенти Сардор Рахимшаихов авиабилеттер алдын ала сатылып алынганын билдирди. Анын айтымында, алгачкы бир нече билет каттоо системасынан ийгиликтүү өткөн. Ошондуктан федерацияда алардын жасалма экенине шек болгон эмес жана калган сумманы да төлөп беришкен.
“Алматы аэропортуна каттоодон өтүүгө барганыбызда, калган билеттер жасалма болуп чыкты. Биз дароо учуунун башка жолдорун издей баштадык жана жаңы билеттерди өз каражатыбызга сатып алууга даяр болдук. Маселе акчада эмес, рейстерде керектүү сандагы орундардын жоктугунда болду”, — деди ал.
Анын айтымында, спортчулардын көпчүлүгү жашы жете электер. Ошондуктан команданы чакан топторго бөлүп жөнөтүү мүмкүн болгон эмес - катышуучулар машыктыруучулары жана коштоочулары менен чогуу учушу керек болчу. Билет табуу аракеттери ийгиликсиз болгондон кийин делегация Бишкекке кайтууга аргасыз болгон.
Рахимшаихов спортчулар чемпионатка жарым жылдан ашык убакыт даярданышканын белгиледи. Айрымдары үчүн бул ушундай деңгээлдеги алгачкы ири эл аралык мелдеш болмок.
“Спортчулардын көз жашын көрүш керек эле. Бул мелдешке көпкө чейин даярданган балдар да, чоңдор да ыйлашты. Ар бири Кыргызстанды татыктуу көрсөтүп, өлкөнүн желегин көтөрүүнү кыялданган”, — деди ал.
Сапардын үзгүлтүккө учурашынан кийин укук коргоо органдарына арыздар берилген. Рахимшаиховдун айтымында, авиабилеттер үчүн төлөмдү жүргүзгөн кызматкер кармалган. Федерация тергөө бардык катышуучулардын жоопкерчилик деңгээлин аныктайт деп үмүттөнөт.
Ал ошондой эле авиабилеттерге байланыштуу документтер туристтик компаниянын мөөрү менен күбөлөндүрүлгөнүн белгиледи. Ошондуктан федерацияда алардын жасалмалуулугунан күмөн саноого негиз болгон эмес.
Кийинчерээк Биринчи Май райондук ички иштер башкармалыгынын басма сөз кызматы 1993-жылы туулган шектүү авиабилеттерди сатууда алдамчылык кылган деген шек менен кармалып, Бишкек ШИИББинин убактылуу кармоочу жайына киргизилгенин билдирди.
Компаниянын версиясы боюнча, авиабилеттерди мурдагы кызматкер тариздеген. Ал компанияда болжол менен эки жарым ай расмий эмес иштеп, туристтер менен байланышкан башка окуядан кийин май айында жумуштан бошотулган.
Турфирманын маалыматына караганда, авиабилеттер үчүн акча компаниянын эсебине эмес, мурдагы кызматкердин жеке эсептерине түшкөн.
Ошондой эле компаниянын өкүлдөрү уюмдун мөөрү жетекчиликтин уруксатысыз колдонулушу мүмкүн экенин билдиришти. Алардын версиясы боюнча, мурдагы кызматкер мөөрдү кеңседе иштеп жүргөндө пайдаланып калышы мүмкүн. Компания окуяга тиешеси бар экенин толугу менен четке кагып, жоопкерчилик мурдагы кызматкерде экенин билдирүүдө.
Мындан тышкары, компания мурдагы кызматкерге байланыштуу башка иш берүүчүлөрдөн жана кардарлардан буга окшош учурлар боюнча кайрылуулар болгонун билдирди. Бул маалымат туристтик агенттиктин позициясын чагылдырат жана жарыяланган учурда соттун чечимдери менен тастыкталган эмес.
Сапардын үзгүлтүккө учураганына карабастан, курама команда машыгууларын кайрадан жандандырып, Дүйнө кубогуна даярдык көрө баштады. Федерация спортчулар катуу көңүлү калганына карабай, багынбай турганын жана эл аралык аренада Кыргызстанды көрсөтүү укугу үчүн күрөштү улантарын билдирди.
Ал эми окуяга укуктук баа берүү жана күнөөлүүлөрдү аныктоо тергөөнүн милдети.
