Жарыяланган
2025-11-02, 12:17Кепилдик фондду түзүлгөндөн баштап 2024-жылдын 31-декабрына чейинки иш-чаралардын жыйынтыгы боюнча экспортко багытталган ишканаларга берилген кепилдиктердин жалпы суммасы 1 миллиард 71 миллион сомду түздү. Бул ишкерлерге 3 миллиард 836 миллион сом өлчөмүндө кредиттик ресурстарды тартууга мүмкүндүк берди.
Кепилдиктердин эң көп көлөмү Чүй облусуна берилген, анда ишкерлер 375,1 млн сом өлчөмүндө колдоо алышкан, бул дээрлик 1,48 млрд сом өлчөмүндө кредиттерди тартууну камсыз кылган. Талас облусунда кепилдиктер 338,7 млн сомду түзсө, насыянын көлөмү 1,2 млрд сомго жеткен. Ош облусу 191,2 миллион сом кепилдик жана 590,6 миллион сом насыя менен үчүнчү орунга чыкты.
Жалпысынан отчеттук мезгилде экспортко багытталган ишканаларга 1 млрд 573 млн сом суммасында кепилдик колдоо көрсөтүлдү, бул 5 млрд 432 млн сом өлчөмүндө кредиттик ресурстарды тартууга мүмкүндүк берди. Кепилдиктердин негизги бөлүгү айыл чарбасына жана кайра иштетүүгө – 955,3 млн сом, ошондой эле өнөр жайга – 447,7 млн сом багытталган. Транспорт, туризм, кызмат көрсөтүү жана соода тармагына 170,2 миллион сомдон ашык түшкөн.
