Жарыяланган
2024-20-11, 14:34Бүгүн Жогорку Кеңештин жыйынында Бишкек шаарынын Эркин экономикалык аймагында (ЭЭА) электрондук тамекилерди чыгарууга жана сатууга уруксат берген мыйзам эки окууда кабыл алынды. Бир ай мурун эле Кыргызстанда электрондук тамеки чыгарууга жана сатууга тыюу салынганына байланыштуу бул мыйзам кызуу талкууга алынды.
Депутат Дастан Бекешев бул мыйзам долбоорунун кабыл алынышына нааразычылыгын билдирди. Ал белгилегендей, тыюу салуулар көп учурда оң натыйжа бербейт жана анын ордуна салыкты көтөрсө болмок деп эсептейт.
"Азыр биз компанияларга Эркин экономикалык аймакта электрондук тамеки чыгарууга жана продукциянын бир бөлүгүн экспортко жөнөтүүгө уруксат берип жатабыз, бирок продукциянын 20% гана ЭЭАдан Кыргызстанга жөнөтүлөт. Көзөмөл кандай болору мага түшүнүксүз", - деди депутат.
Бекешевдин айтымында, бул мыйзамдын кабыл алынышы коррупциялык тобокелчиликтерге байланыштуу болушу мүмкүн, анткени чечим процедураларды бузуу менен кабыл алынган. Ал ошондой эле өзүнчө добуш берүү сунушу четке кагылып, жыйынтыгында мыйзам долбоору көпчүлүк депутаттардын колдоосуна ээ болгонун белгиледи.
