Жарыяланган
2025-28-02, 15:59Эмгек, социалдык камсыздоо жана миграция министрлиги менен Эл аралык ишкерлер кеңеши уюштурган жыйында Кыргызстандын Эмгек кодексинин жаңы редакциясы сунушталды. Мекеменин бөлүм башчысы Бермет Карабаева белгилегендей, жаңыланган документ колдонууга жеңил болуп калды. Алсак, 446 берененин ордуна азыр 267 берене калды, анткени айрым жоболор башка мыйзамдарга которулуп, бириктирилип же алынып салынган.
Негизги жаңычылдыктардын бири – аралыктан жана аралаш иштөөнүн расмий түрдө таанылышы болду. Эми кызматкерлер өз милдеттерин аралыктан же заманбап санариптештирүү тенденцияларына жооп берген гибрид форматта аткара алышат.
Ошондой эле электрондук эмгек келишимдери жана эмгек китепчелери ишке киргизилди, бул ишке орношуу процессин жөнөкөйлөтүп, кадрдык иш кагаздарын ачык-айкын кылат.
Маанилүү өзгөрүү эмгек акы боюнча талаштарга таасирин тийгизди: эгерде мурда мындай иштер боюнча эскирүү мөөнөтү чексиз болсо, азыр үч жылды түзөт.
Мындан тышкары, эмгек акы азыр кесиптик стандарттарды эске алуу менен иштин көлөмүнө, сапатына жана татаалдыгына жараша болот. Ал эми эмгек акыны, эмгек өргүүсүн жана жумуштан бошотуу боюнча акыркы эсептешүүлөрдү өз убагында төлөбөгөндүгү үчүн иш берүүчүлөр кечиктирилген ар бир күн үчүн 0,25% өлчөмүндө айып төлөйт.
Практика иш ордунда окутуунун бир түрү катары бекитилген, бул жаш адистердин кесипке тезирээк көнүшүнө жардам бериши керек.
Калктын аярлуу катмары үчүн жумушка орношуу квотасы каралган. Тактап айтканда, иш берүүчүлөр балдар үйүнүн бүтүрүүчүлөрүн жана ден соолугунун мүмкүнчүлүгү чектелген жарандарды жумушка алууга милдеттүү.
Бул өзгөртүүлөрдүн көбү бизнес өкүлдөрү тарабынан сунушталып, өлкөнүн инвестициялык жагымдуулугун жогорулатууга багытталганы белгиленген.
